Ylli i Real Madridit, Jude Bellingham, ka folur hapur për periudhën e vështirë që ka përjetuar gjatë sezonit të kaluar, duke pranuar se presioni dhe ngarkesa e futbollit e kishin ndikuar edhe në aspektin personal.

Në një intervistë për revistën britanike “Vogue”, anglezi ka zbuluar se kishte kaluar momente të vështira emocionalisht.

“Ndonjëherë sezonin e kaluar ndihesha sikur gjithçka po më konsumonte. Isha shumë i tensionuar dhe i stresuar. Fillova të flisja me dikë që më ndihmoi shumë për ta menaxhuar këtë situatë”, ka rrëfyer Bellingham.

Mesfushori ka folur edhe për rëndësinë e rikuperimit fizik, duke treguar se kalendari i ngjeshur ndikon shumë në jetën e tij.

Ai ka pranuar se, pas katër ndeshjeve brenda 14 ditësh, dëshira e vetme është të përfundojë procesin e rikuperimit dhe të pushojë.

Bellingham është ndalur edhe te përgjegjësia që ka si figurë publike, duke thënë se dëshiron të jetë shembull pozitiv për gjeneratat e reja.

“Jashtë fushës dua të jem një zotëri”, ka deklaruar në fund 23-vjeçari.