Të paktën pesë palestinezë janë vrarë pasi një sulm ajror izraelit goditi një ndërtesë në Spitalin Nasser, në jug të Rripit të Gazës, ka bërë të ditur për BBC-në një zyrtar i Mbrojtjes Civile, që vepron nën autoritetin e Hamasit.

Dëshmitarët okularë kanë deklaruar se një raketë e vetme, e lëshuar nga një avion luftarak që fluturoi për pak çaste mbi zonë, goditi ndërtesën ku ndodhen repartet e kirurgjisë dhe njësitë e kujdesit intensiv të spitalit. Nga sulmi janë plagosur edhe 20 persona të tjerë, sipas zëdhënësit të Mbrojtjes Civile, transmeton Sinjali.

Në mesin e viktimave raportohet të jetë edhe një kirurg, i cili u vra gjatë sulmit në orët e hershme të së enjtes.

Ndërkaq, ushtria izraelite ka deklaruar se cak i sulmit ishte një anëtar i lartë i Hamasit dhe militantë të tjerë, të cilët, sipas saj, po e përdornin spitalin si “qendër komanduese për aktivitete ushtarake dhe terroriste”.

Në një deklaratë të përbashkët, Forcat e Mbrojtjes së Izraelit (IDF) dhe Agjencia e Sigurisë së Izraelit (ISA) kanë dënuar ashpër atë që e cilësuan si shfrytëzim të “infrastrukturës civile dhe mjekësore për qëllime ushtarake” nga Hamasi.

Ato kanë shtuar se gjatë operacionit janë ndërmarrë masa për të zvogëluar rrezikun ndaj civilëve, përfshirë përdorimin e municioneve precize dhe mbikëqyrjen ajrore.

Sipas së drejtës ndërkombëtare, spitalet gëzojnë mbrojtje të veçantë, megjithatë ato janë goditur vazhdimisht gjatë luftës në Gaza.

Izraeli e akuzon Hamasin, i cili vazhdon të mbajë armët dhe kontrollin e sigurisë në Rripin e Gazës, se po i përdor spitalet për qëllime ushtarake. Sipas autoriteteve izraelite, grupi palestinez ruan armë dhe operon qendra komanduese e kontrolli brenda spitaleve. Hamasi i mohon këto pretendime.