Komisioni Parlamentar për Punë të Jashtme dhe Diasporë, ka marrë iniciativë që t’u drejtohet kryetarëve të Komisioneve të Punëve të Jashtme të Parlamenteve të vendeve të BE-së, Mbretërisë së Bashkuar, dhe ShBA-së, për të shprehur shqetësimin për pamundësinë që qytetarët e Republikës së Kosovës të udhëtojnë lirshëm pa viza nëpër vendet e Bashkimit Evropian.

Sipas kryetares së këtij komisioni, Time Kadrijaj, procesi i liberalizimit të vizave ka mbetur ende një proces i pakryer.

“Kosova ka përmbushur kriteret e nevojshme, Komisioni Evropian ka dhënë rekomandim pozitiv për liberalizim të vizave, dhe kjo është votuar në Parlamentin Evropian. Ne si komision, po kërkojmë nga kryetarët e Komisioneve për Punë të Jashtme të Parlamenteve përkatëse që të ndikojnë në vendet e tyre në mënyrë që të kemi liberalizim të vizave për qytetarët e Republikës së Kosovës”, ka shkruar Kadrijaj në llogarinë e vet në “Facebook”.

(M.Q / Epoka e re)