Qeveria e Kosovës ka dështuar në menaxhimin e pandemisë së shkaktuar nga koronavirusi dhe sigurimin e vaksinës kundër Covid-19, deklaruan të hënën deputetët e partive opozitare, gjatë seancës së Kuvendit të Kosovës, të thirrur për të diskutuar gjendjen me pandeminë Covid-19 në vend.

Ministri i Shëndetësisë, Arben Vitia ka thënë se do të mbajë përgjegjësi morale dhe ligjore nëse del e vërtetë se ka rrezikuar procesin e furnizimit me vaksina, ndërkaq u shpreh i gatshëm të jap edhe dorëheqje nëse ka ndodhur diçka e tillë.

“Jam i gatshëm, që nëse ka ndodhur diçka e tillë, unë jap dorëheqje nga ministri”, ka thënë ai.

Vitia ka thënë se Kosova është në rrugë të mbarë për sigurimin e vaksinave.

Komitetet e ngritura për vaksinim, u shpreh ai, po përgatisin planin e resurseve humane për distribuimin dhe administrimin efikas dhe efektiv të vaksinave që do të vijnë së shpejti.