Inspektorati i Policisë së Kosovës (IPK) ka konfirmuar se drejtori i përgjithshëm i Policisë së Kosovës, Samedin Mehmeti, është intervistuar në cilësinë e dëshmitarit për një rast.

Përmes një komunikate për media të IPK-së thuhet se ai është intervistuar lidhur me rastin ku një prej vartësve të tij është i dyshuar për veprën penale “ushtrim ndikimi” dhe “zbulim i fshehtësisë zyrtare”.

“Me qëllim të informimit të drejtë të opinionit IPK njofton se intervistimi i tij nuk ka ndërlidhje me rastin e konfiskimit të substancës së dyshuar narkotike të cilin rast është duke e hetuar vet Policia e Kosovës. Inspektorati Policor i Kosovës  duke i falënderuar për bashkëpunimin e vazhdueshëm, inkurajon mediet që para publikimit të informacioneve t’i drejtohen Divizionit për bashkëpunim dhe informim të IPK-së për sqarimin e informacioneve dhe marrjen e informatave të sakta, në mënyrë që të ketë informim të drejtë të opinionit publik”, thuhet tutje në komunikatë.