Në shortin e hedhur për rrethin e parë parakualifikues të Eurobasket 2025, Kosova ishte në Grupin C me Norvegjinë dhe Danimarkën. “Dardanët” pësuan nga Norvegjia 86:77, kurse fituan ndaj danezëve 78:73.

Sot (e enjte) do të ndeshen Danimarka me Norvegjinë me fillim nga ora 19:00, ndërsa të dielën Kosova e pret Norvegjinë me fillim nga ora 19:00 në Mitrovicë. Vendi i parë kualifikohet në rrethin e dytë parakualifikues, si dhe e dyta më e mira nga tri grupet. “Dardanët” shpresojnë në fitore ndaj Norvegjisë, kurse takimin e fundit do ta kenë në udhëtim ndaj Danimarkës më 30 qershor.

Në këto përballje është i rëndësishëm koshdallimi dhe takimet direkte, andaj basketbollistët e Kosovës janë të motivuar për t’u kualifikuar në rrethin e ardhshëm. Grumbullimi ka filluar nga dita e shtunë (19 shkurt) dhe lojtarët po japin maksimumin në stërvitje, kurse presin përkrahje nga tifozët në “Minatori” të Mitrovicës.