Atletja shqiptare Luiza Gega ka arritur të korrë një rezultat të shkëlqyer në Lojërat Mesdhetare të Oran-it.

Olimpistja fitoi medaljen e artë në garën e 3 mijë metrave me pengesa me kohën 9’14”31.

Kjo e fundit, është një arritje më vete për vrapuesen pasi regjistroi edhe një rekord të ri kombëtar.

Gega udhëhoqi garën që prej fillimit, duke mos e vënë asnjëherë në dyshim fitoren e saj.

Atletja përsëriti vetveten, pasi para katër vitesh fitoi medaljen e artë në Lojërat Mesdhetare të Tarragonës në Spanjë.

Pas këtij suksesi të Gegës, numri i medaljeve të sportistëve shqiptarë në Oran të Algjerisë shkoi në tre, dy të arta dhe një bronzi.