Ministri i Punëve të Brendshme, Xhelal Sveçla, ka pritur një delegacion amerikan të prirë nga zëvendësdihmëssekretarja e Shtetit, Lisa Johnson.

Më këtë rast, ministri Sveçla ka vënë në pah bashkëpunimin e shkëlqyer mes institucioneve të Kosovës, në veçanti të MPB-së dhe agjencive të saj me ShBA-të, i cili përmes programeve mbështetur nga INL, ICITAP dhe të tjera, po vazhdojnë të mbështesin procese të rëndësishme, të cilat po ndihmojnë në sundimin e rendit dhe të ligjit në Republikën e Kosovës.

Ministri Sveçla ka theksuar se Republika e Kosovës është e përkushtuar në luftën e pakompromis në luftimin e krimit dhe korrupsionit me theks të veçantë në luftimin e trafikimit të narkotikëve, trafikimit me qenie njerëzore dhe trafikimit të armëve etj.

Ndërsa Johnson ka përgëzuar arritjet e deritanishme si dhe ka theksuar se Ministria e Punëve të Brendshme është një partner i rëndësishëm, dhe për këtë vlerësoi se bashkëpunimi për forcimin dhe zbatimin e ligjit do të vazhdojë.

Të dy palët u dakorduan që të intensifikojnë bashkëpunimin në luftimin e krimit dhe dukurive tjera negative për të kontribuar jo vetëm në sigurinë e vendit por dhe në stabilitetin rajonal.