Futbollisti me prejardhje nga Gjakova, Kreshnik Krasniqi, ka vizituar sot presidentin e FFK-së, Agim Ademi. Talenti kosovar, i cili është lindur dhe rritur në Norvegji, e që njëherësh veprimtarinë prej futbollisti e zhvillon në Superligën norvegjeze tek klubi Stromsgodset, këto ditë ndodhet në Kosovë për pushime.

Gjatë vizitës që i bëri shtëpisë së futbollit kosovar, Krasniqi e falënderoi të parin e FFK-së për përkujdesjen e shtuar ndaj tij pas lëndimit.

Ndërkaq, presidenti Ademi e falënderoi futbollistin dardan për vizitën dhe uroi që ai sa më shpejtë të rikthehet në formën e tij dhe të performojë me fanellën e Kosovës ashtu siç ka bërë deri tani.

Kujtojmë që futbollisti i Kombëtares U21, kishte pësuar lëndim në ndeshjen e tij të fundit me këtë grupmoshë ndaj Armenisë në udhëtim në muajin qershor të këtij viti.