Presidentja e Kosovës, Vjosa Osmani, ka pritur në takim zëvendësndihmëssekretarin e Shtetit të ShBA-së, njëherësh të dërguarin amerikan për Ballkanin Perëndimor, Gabriel Escobar.

Escobarin do ta presë në takim edhe kryeministri i Kosovës, Albin Kurti.

Takimi Kurti-Escobar zhvillohet në ndërtesën e qeverisë në ora 16:30.

Vizita e Escobarit vjen në kohën kur situata në veri të Kosovës , zonë e banuar me shumicë serbe është e tensionuar.

Disa serbë lokalë atje, qysh më 10 dhjetor, kanë ngritur barrikada, duke bllokuar rrugët që çojnë drejt pikave kufitare me Serbinë, Jarinjë dhe Bërnjak.

Këto veprime  janë ndërmarrë pasi Policia e Kosovës ka arrestuar i ish-pjesëtarin e këtij institucioni, Dejan Pantiq, nën dyshimet për përfshirje në sulme kundër zyrtarëve të Komisionit Qendror të Zgjedhjeve në veri të Kosovës dhe atyre policorë.