Ministria e Punës dhe Mirëqenies Sociale (MPMS), kryetarët e 12 komunave të Kosovës dhe grupi parlamentar 6+ kanë nënshkruar një marrëveshje për ndërtimin e 132 shtëpive për komunitetet që jetojnë në këto komunë.

Këto shtëpi do të ndërtohen në komunën e Pejës, Fushë-Kosovës, Gjakovës, Lipjanit, Obiliqit, Mamushës, Ferizajt, Gjilanit, Suharekës, Shtimes, Podujevës dhe Prizrenit.

Sekretari i MPMS-së, Izedin Bytyqi, ka thënë se synojnë që përmes këtij projekti në vlerë 1.8 milionë euro, të përmirësojnë sado pak mirëqenien e këtyre komuniteteve.

Ndërsa deputeti Danush Ademi nga grupi parlamentar 6+, ka thënë se projekti është dashur të përfundojë në muajin maj, por kanë pasur telashe me disa politikanë të cilët sipas tij kanë dashur ta pengojnë këtë projekt.