Deputeti francez në Parlamentin Evropian, Nicolas Bay, përmes llogarisë së tij zyrtare në “Twitter” ka goditur Kosovën derisa ka shëtitur nëpër qytetet e saj.

Bay ka qëndruar në Ballkan për tri ditë, konkretisht në Serbi dhe në Kosovë, ku edhe ka vizituar disa monumente kulturore e historike në vend, prej të cilave ka nisur propagandën e fuqishme kundër Kosovës.

Me mbi 21 postime për tri ditë ai e ka quajtur Kosovën “djep të Serbisë”, e objektet kulturore, fetare e historike si pjesë të këtij shteti por të okupuara nga shqiptarët.

Në cicërimën e tij të fundit nga manastiri në Graçanicë, ai ka thënë se pavarësisht “pushtimit të shqiptarëve”, ky vend mbetet i shenjtë dhe u mundëson serbëve të rrënjosin veten në identitetin e tyre.

“Kosova është zemra e kombit serb. Është djepi historik i Serbisë”, kështu e ka nisur shkrimin e tij tjetër në “Twitter”, përsëri nga manastiri ku me një video i është drejtuar mbi 103 mijë ndjekësve të tij në “Twitter”.

Vizitën e tij treditore në Ballkan eurodeputeti francez e kishte nisur në Beograd, më 27 tetor.

Ndërsa vizitën e tij në Kosovë ai e kishte nisur në veri të Mitrovicës. Bay me fotografi të publikuara me ushtarë serbë nga ura në Mitrovicë e quante Ushtrinë Çlirimtare të Kosovës, terroriste dhe ushtarët serbë heronj që luftuan të parandalojnë pushtimin e kësaj ure.

“Në vitin 1999, këta burra luftuan ditë e natë, duke rrezikuar jetën e tyre, për ta ‘mbajtur’ këtë urë të Mitrovicës dhe për të parandaluar pushtimin e terroristëve shqiptarë të UÇK-së në veri të Kosovës. Ata janë heronj të popullit serb”, kishte shkruar eurodeputeti francez.

Ndaj këtyre deklaratave skandaloze të eurodeputetit francez nuk ka pasur asnjë reagim nga ana e institucioneve të Republikës së Kosovës.

Ici, sur le pont de Mitrovica, les serbes chrétiens ont défendu leur territoire face aux attaques des terroristes Albanais de l’UCK.

Ils ont été le rempart de notre civilisation européenne. pic.twitter.com/IW9z200m9I

— Nicolas Bay (@NicolasBay_) October 28, 2022

Skandaloze: Eurodeputeti francez e quan UÇK-në organizatë terroriste