Kryetari i Komunës së Mitrovicës, njëherësh zëvendëspresident i AKR-së, Agim Bahtiri, ka reaguar ndaj përleshjes fizike që ndodhi në këtë qytet sot ndërmjet strukturave të LDK-së gjatë procesit zgjedhor të kësaj partie.

Ai përmes një postimi në llogarinë e vet në “Facebook” ka drejtuar një apel si themelues i LDK-së në vitet ‘89-‘90 në Mitrovicë, që LDK-ja strukturat e saja në këtë qytet t’i zgjedhë në mënyrë demokratike, duke e respektuar vullnetin e anëtarësisë.

Postimi i plotë i tij:

Si themelues i LDK-së në vitet 89-90 në Mitrovicë, apeloj te struktura e kësaj partie që t’i zgjedhin strukturat drejtuese në mënyrë demokratike, duke e respektuar vullnetin e anëtarësisë.

Përleshjet fizike nuk i kontribuojnë klimës së shkëlqyeshme politike të krijuar në Mitrovicë, pas ardhjes time si kryetar komune.

Ndjejë dhimbje të shoh duke pasur probleme apo duke u shembur diçka në krijimin e së cilës kam kontribuar jashtëzakonisht shumë. LDK është parti me shumë vlera, andaj duhet të jep shembull për zgjedhje të lira dhe demokratike.

Përzemërsisht,
Agim Bahtiri