Asociacioni i Gazetarëve të Kosovës (AGK) ka reaguar pas dorëheqjes së gazetares Arlinda Sejda nga Radio Televizioni i Kosovës (RTK), duke shprehur keqardhje për largimin e saj dhe duke e lidhur atë me, siç thuhet, presionin e vazhdueshëm politik në transmetuesin publik.

Përmes një reagimi publik, AGK-ja ka vlerësuar se largimi i Sejdës është konfirmim i kapjes së RTK-së nga menaxhmenti, të cilin e lidh drejtpërdrejt me qeverinë dhe Lëvizjen Vetëvendosje.

“AGK-ja shpreh keqardhje për largimin e Sejdës nga RTK dhe e sheh këtë akt si konfirmim të kapjes së këtij institucioni nga menaxhmenti i lidhur drejtpërdrejt me qeverinë dhe partinë politike në pushtet, Vetëvendosje. Largimi i Sejdës dhe largimi i emisioneve të disa gazetarëve e redaktorëve ndodhin si pasojë e politikave menaxhuese që ndëshkojnë dhe përndjekin këdo që synon t’i respektojë parimet themelore të etikës së profesionit”, është thënë në reagim.

Sipas AGK-së, RTK-ja është shndërruar prej kohësh në një mjet propagandues të Vetëvendosjes përmes politikave redaktuese që, sipas saj, censurojnë zërat kritikë brenda dhe jashtë mediumit.

Asociacioni ka theksuar se rënia e lirisë së medias në Kosovë, e dokumentuar edhe në raporte ndërkombëtare, lidhet me kontrollin politik dhe financiar të RTK-së nga qeveria.

AGK-ja ka shprehur solidaritet me gazetaren Arlinda Sejda dhe me gazetarët e redaktorët e RTK-së, të cilët, sipas saj, vazhdojnë të përballen me presione gjatë ushtrimit të profesionit.

Në fund, AGK-ja i ka bërë thirrje Qeverisë së Kosovës dhe Lëvizjes Vetëvendosje që të ndalin presionin politik dhe financiar ndaj RTK-së, ndërsa Bordit të transmetuesit publik i ka kërkuar të mos qëndrojë indiferent, por të kërkojë llogari nga menaxhmenti dhe të sigurojë që raportimi të jetë në shërbim të interesit publik.