Rusia mund të ketë arritur kufijtë e pranisë së saj detare në kohë paqeje në Detin Baltik, ndërsa shtimi i patrullimeve të NATO-s duket se po pengon aktivitetet e mundshme armiqësore, deklaroi të hënën shefi i Marinës së Finlandës.

Admirali Tuomas Tiilikainen i tha televizionit Sky News se situata e sigurisë detare mbetet “e tensionuar”, por “e qëndrueshme”, duke theksuar nevojën për të shmangur përshkallëzimin e mëtejshëm.

“Ata (Marina ruse) monitorojnë atë që bëjmë ne dhe atë që bën NATO-ja. Natyrisht, edhe ne duhet të monitorojmë dhe të mbajmë vigjilencë të vazhdueshme ndaj veprimeve dhe aktiviteteve të tyre”, tha ai.

Tiilikainen sugjeroi se Moska mund të mos shohë “nevojë të menjëhershme” për të zgjeruar praninë e saj detare, ose mund të ketë arritur kufijtë e kapaciteteve të saj operacionale në kohë paqeje në Detin Baltik.

NATO-ja nisi misionin “Baltic Sentry” në janar të vitit 2025 për të forcuar mbikëqyrjen detare, pas një serie incidentesh të dyshuara sabotimi që përfshinë kabllot e telekomunikacionit dhe infrastrukturën energjetike nënujore.

Misioni përfshin dislokimin e anijeve ushtarake dhe avionëve për të monitoruar këtë korridor strategjik detar, si dhe për të zbuluar dhe parandaluar kërcënimet e mundshme ndaj infrastrukturës kritike.

Anijet që i përkasin të ashtuquajturës flotë në hije të Rusisë kanë qenë ndër të dyshuarat kryesore në incidentet që kanë përfshirë infrastrukturën nënujore.

Javën e kaluar, një gjykatë finlandeze dënoi kapitenin e një anijeje mallrash dhe një anëtar tjetër të ekuipazhit për sabotim lidhur me dëmtimin e dy kabllove të telekomunikacionit që lidhin Finlandën me Estoninë në dhjetor të vitit 2025. Sipas raportimeve, kapiteni ishte shtetas rus.

Tiilikainen tha se që nga ky incident nuk është regjistruar asnjë sulm tjetër ndaj infrastrukturës nënujore të Finlandës.

Një zyrtar ushtarak i NATO-s i tha Sky News se aleanca zakonisht mban të paktën tri anije luftarake për çdo anije ushtarake ruse që operon në Detin Baltik, ndërsa raporti aktual vlerësohet të jetë rreth 4 me 1.

Vendet anëtare të NATO-s kanë intensifikuar gjithashtu përpjekjet për të ndaluar dhe inspektuar anijet e dyshuara të flotës në hije, ndërsa besohet se këtë vit janë zhvilluar të paktën 13 operacione të tilla në Evropë.