Luka Misetiq, avokat i ish-presidentit të Kosovës, Hashim Thaçi, ka njoftuar përmes një postimi në platformën “X” se Paneli i Apelit i Dhomave të Specializuara të Kosovës ka miratuar edhe një apel tjetër të Prokurorisë.

Ai ka theksuar se të gjitha apelet e Prokurorisë janë miratuar, ndërsa të gjitha apelet e mbrojtjes janë refuzuar nga Paneli i Apelit.

“Paneli i Apelit i Dhomave të Specializuara në gjykimin ndaj Hashim Thaçit për mosrespektim të gjykatës sapo miratoi edhe një apel tjetër të Prokurorisë. Bilanci aktual në dy çështjet e tij që janë ende në shqyrtim: apele të prokurorisë: 3 nga 3 të miratuara (100% sukses) dhe apele të mbrojtjes: 44 nga 44 të refuzuara (100 për qind dështim)”, ka shkruar ai.

Avokati ka deklaruar se Dhomat e Specializuara të Kosovës duhet t’i nënshtrohen një vlerësimi pas përfundimit të mandatit të tyre, duke vënë në dyshim drejtësinë e kësaj gjykate.

“Kur Dhomat e Specializuara të Kosovës t’i nënshtrohen një vlerësimi të pashmangshëm pas përfundimit të mandatit të tyre, drejtësia gjyqësore do të jetë një nga temat kryesore të debatit”, ka shkruar Misetiq.