Bashkimi Evropian (BE) ka theksuar se ka mbledhur dëshmi për aktivitete “të vazhdueshme dhe të qëndrueshme” të dezinformimit nga Rusia, me synim që të ndikonte në rezultatet e zgjedhjeve të majit për Parlamentin Evropian.

Raporti i Komisionit Evropian (KE) ka thënë se “burimet ruse” janë përpjekur të kufizojnë pjesëmarrjen e votuesve dhe të ndikojnë në preferencat e tyre.

Raporti nuk ka shpjeguar se çfarë nënkupton me “burimet ruse”.

Raporti i KE-së ka pasuar paralajmërimet qysh para zgjedhjeve të Brukselit për vendet e BE-së dhe kompanitë e medieve sociale, që të jenë syhapur përballë lajmeve të mundshme të rreme nga Rusia.

Aktivitetet malinje-të vërejtura në raportin e 14 qershorit, variojnë nga sfidimi i legjitimitetit demokratik të BE-së deri te shfrytëzimi i debateve përçarëse mbi çështje si migracioni.

Komisioni Evropian (KE) ka theksuar se përpjekjet e tij për të luftuar lajmet e rreme kanë ndihmuar në reduktimin e sasisë së dezinformatave që shfaqen në internet, por ai shtoi se duhet bërë më shumë.

“Taktikat e përdorura nga aktorët e brendshëm dhe të jashtëm, në veçanti të lidhura me burimet ruse, po zhvillohen shpejt, njësoj si edhe masat që ndërmarrin shtetet dhe platformat online”, ka theksuar Komisioni Evropian.