Legjendari Eric Cantona beson se paaftësia e Cristiano Ronaldos për të pranuar faktin se ka hyrë në fazën e fundit të karrierës së tij si lojtar ka qenë arsyeja kryesore e largimit “të hidhur” të portugezit nga “Old Trafford”.

“Vendosa të tërhiqem i ri, kjo është një çështje tjetër dhe disa njerëz duan të luajnë deri në moshën 40-vjeçare”, tha francezi 56-vjeçar për “Manchester Evening News”, dhe shtoi: “Ju keni dy lloje lojtarësh; ata që duan të luajnë çdo lojë sepse ende mendojnë se janë 25 vjeç dhe ata që e kuptojnë se nuk janë. Ata e dinë që nuk do të luajnë çdo ndeshje, e dinë që do të luajnë vetëm disa ndeshje, por janë aty për të ndihmuar lojtarët e rinj. Një pjesë e punës së tyre është të ndihmojnë lojtarët e rinj, siç po bën Zlatan Ibrahimoviq në Milano, dhe para tij Paolo Maldini, ose Ryan Giggs te Manchester United.

“Ronaldo nuk e kuptoi dhe nuk e kupton ende që nuk është më 25 vjeç. Ai është më i vjetër dhe duhet ta kishte kuptuar që në vend që të mos ishte i lumtur që nuk luante çdo ndeshje, të thoshte: “Mirë, nuk jam 25 vjeç, nuk mund të luaj çdo lojë, por do të ndihmoj lojtarët e rinj”, shpjegoi sulmuesi legjendar i United.

Cantona u tërhoq nga futbolli në moshën 30-vjeçare, pasi ndihmoi United të fitonte katër tituj të Premier League në pesë sezone, dhe kur ai dukej se ishte ende në kulmin e fuqive të tij. Që atëherë, ai ka ndërtuar një karrierë në industrinë e filmit si aktor, regjisor dhe producent dhe ka dëshmuar se mund të menaxhojë edhe jashtë fushës së futbollit. Megjithatë, në një intervistë për gazetën Manchester, ai pranoi se është i vetëdijshëm se sa e vështirë mund të jetë të pajtohet me pensionin, dhe la të kuptohet se madje simpatizon Ronaldon, duke e krahasuar fundin e karrierës së tij me vdekjen.

“Nuk mund të vrapoj aq shpejt sa kur isha 30-vjeç, duhet ta pranoj këtë. Duhet të pranoj që një ditë do të vdes. Është e vështirë të pranohet, por duhet. Dhe fundi i një karriere është si të vdesësh, është një vdekje e vogël”, përfundoi ai.