Shefi i grupit parlamentar të Aleancës për Ardhmërinë e Kosovës (AAK), Besnik Tahiri, i ka kërkuar Lëvizjes Vetëvendosje  që të votojnë formimin e një Komisioni hetimor, që sipas tij do të hetojë disa nga proceset që kanë ndodhur së fundmi në vend, përfshirë punësimet në KEK dhe shtrenjtimin e tarifave të energjisë e të tjera.

Fillimisht, Tahiri ka thënë se ai nuk është iniciues për formimin e këtij komision, por se është vetëm nënshkrues.

“Iniciuesi është PDK-ja. Unë nuk jam në PDK-ja. Unë jam kryetar i grupit parlamentar të AAK-së dhe si deputet kam nënshkruar një kërkesë të iniciuesit që shpeshherë ka ndodhur që kolegë deputetët të këtij grupi mos me nënshkruar në një kërkesë të opozitës që rrjedhimisht nuk janë iniciues”, ka thënë ai.

Deputeti i AAK-së, i ka kërkuar kryetarit të Kuvendit të Kosovës, Glauk Konjufca dhe shefes së grupit parlamentar të LV-së, Mimoza Kusari-Lilës që të votojnë këtë komision, nëse duan bashkëpunim afatgjatë me opozitën.

“Kam kërkesë për ty kryetar dhe znj. Kusari -Lila. Është e domosdoshme që nëse dojmë me pas një frymë të një bashkëpunimi afatgjatë për çështje të rëndësishme kërkojmë nga ku që të merrni seriozisht dhe të votoni. Ju themi troç, nuk do të kalojë dhe nuk do të heshtimin dhe nuk do të pranojmë mosthemelimin e këtij komisioni”, ka thënë ai.

Më tutje, ai ka deklaruar se nëse pozita mendon se ky komision është antikushtetues, çështja sipas tij mund të dërgohet edhe në Gjykatë Kushtetuese.

“Nëse ju mendoni se ky komision është jokushteteues adresoni çështjen në Gjykatë Kushtetuese. Me bëni mua iniciues kur nuk jam iniciues, jam nënshkrues. Deputetët e AAK-së janë nënshkrues të një inicimi që e ka nisur PDK-ja. Pyetja shtrohet këtu z.Konjufca dhe deputetëve. Çka jemi tu fshehë?. Pse nuk po bëjmë hetim parlamentar për çështja thelbësore që janë nis? Pse mos me pas një hetim parlamentar ku shumica e anëtarëve janë të LV-së dhe të shohim se a ka reaguar qeveria me kohë në krizën energjetike. Tarifat a janë të drejta apo jo, cila është rrjedha, lidhja në mes të KEDS, KEK e kështu me radhë. Punësimet në KEK. Pse mos me bë një hetim, çfarë po fshihni?”,ka thënë Tahiri.