Djali i presidentit Joe Biden, Hunter, firmosi një marrëveshje për pranimin e fajësisë me prokurorët, në akuzën për mashtrim me taksat.

Akordi vjen, pasi marrëveshja e tij e mëparshme për t’u deklaruar fajtor për evazion fiskal, me qëllim për të shmangur burgun, u refuzua nga një gjykatë, raporton noa.al.

Marrëveshja origjinale u prish pasi gjyqtari ngriti shqetësimet se ajo do të lejonte që Hunter Biden të mos ndiqej penalisht për armëmbajtje në një rast të veçantë, tha një reporter i Bloomberg në një postim në Platformën X (ish-Twitter), citon noa.al.

CNN raportoi se marrëveshja u anulua për shkak të hetimeve në vazhdim për shkelje të mundshme të Aktit të Regjistrimit të Agjentëve të Huaj (FARA).

Sipas marrëveshjes më të kufizuar, djali i presidentit firmosi se pranonte fajësinë për akuzat që përfshinin periudhën 2014-2019 dhe që përfshijnë shkelje tatimore, përdorim të drogës dhe posedim të armëve.

Megjithatë, marrëveshja nuk e mbron atë nga akuzat e mundshme penale në të ardhmen.

Sipas prokurorëve, Biden Jr. nuk ka paguar taksa për më shumë se 1.5 milionë dollarë të ardhura për 2017-2018.

Ai u akuzua edhe për një rast tjetër për armëmbajtje pa leje edhe pse ishte i varur dhe përdorte substanca të kontrolluara, që sipas rrethanave përbën një vepër penale.

Sipas marrëveshjes së tij origjinale me prokurorët federalë në Delaware, Hunter Biden do të merrte një marrëveshje për pranimin e fajësisë për atë akuzë, në mënyrë që të mos ndiqej penalisht dhe të shmangte dënimin ose burgimin.

Avokatët e tij i thanë gjykatës këtë javë se marrëveshja është “e pavlefshme”.

Republikanët kanë akuzuar prej kohësh Hunter Biden se ka shfrytëzuar ndikimin politik të babait të tij për përfitime personale në marrëdhëniet e tij të biznesit në Ukrainë dhe Kinë.

Megjithatë, një hetim nga Prokurori i Distriktit të Delaware, David Weiss, i cili u emërua në këtë post nga Donald Trump, nuk gjeti asnjë provë për të mbështetur këtë pretendim.

Trump dhe aleatët e tij folën për “trajtim të favorshëm” për Hunter Biden kur marrëveshja e tij me prokurorët u bë e njohur në qershor.

Këto akuza çuan në një hetim penal nga Weiss, i cili u lejua të qëndronte në detyrë dhe të vazhdonte hetimet e tij edhe pse Trump u mund në zgjedhjet e vitit 2020 nga Joe Biden.