Eksperti kryesor amerikan i sëmundjeve ngjitëse, Anthony Fauci, ka thënë se presidenti i zgjedhur i Shteteve të Bashkuara, Joe Biden dhe nënpresidentja e zgjedhur, Kamala Harris, duhet të vaksinohen me vaksinën kundër koronavirusit sa më shpejt që është e mundshme.

Duke folur në një program të televizionit “ABC”, Fauci ka thënë: “Për arsye sigurisë, vërtet ndihem fuqishëm që duhet t’i vaksinojmë ata (Bidenin dhe Harrisin) sa më shpejt që mundemi”.

Ai ka theksuar se do të donte ta shihte Bidenin plotësisht të mbrojtur në kohën kur ta marrë detyrën zyrtare në presidencë në janar, shkruan “The Guardian”.

Më herët gjatë kësaj jave, presidenti në larg, Donald Trump, papritmas e ka tërhequr planin për vaksinimin e zyrtarëve në Shtëpinë e Bardhë.

Fauci ka thënë se ndonëse Trumpi ndoshta ende ka antitrupa të virusit që do ta mbrojnë atë të paktën për disa muaj, ai duhet ta marrë vaksinën për të qenë dyfish i sigurt.

Sipas Faucit, vaksinën kundër koronavirusit duhet ta marrë edhe Nënpresidenti në largim, Mike Pence.

“Ju ende dëshironi që t’i mbroni njerëzit që janë shumë të rëndësishëm për vendin tonë tash për tash”, ka thënë Fauci.