FBI ka nisur një hetim pasi rrjeti britanik “BBC” zbuloi pretendimet se ish-CEO i Abercrombie & Fitch (A&F) shfrytëzonte seksualisht dhe abuzonte me meshkuj të tjerë në eventet që ai organizonte në mbarë botën.

Mike Jeffries dhe partneri i tij britanik gjithashtu përballen me një padi civile duke pretenduar se ata drejtuan një operacion trafikimi seksual.

Agjentët e FBI-së tani po intervistojnë dhe lëshojnë fletëthirrje për dëshmitarët e mundshëm.

Hetimi po udhëhiqet nga agjentë të FBI-së të specializuar në krimet e dyshuara seksuale dhe prokurorë federalë nga Distrikti Lindor i New Yorkut.

FBI dhe Zyra e Prokurorit të SHBA refuzuan të komentojnë.

Në tetor, një seri dokumentarësh dhe podkastesh të “BBC-së” zbuluan pretendimet se Mike Jeffries dhe partneri i tij Matthew Smith kishin shfrytëzuar të rinjtë për seks në ngjarjet që ata organizonin në rezidencat e tyre dhe në hotele luksoze.

Tetë burra i thanë “BBC-së” se kishin marrë pjesë në këto evente në qytete duke përfshirë Londrën, Parisin dhe Marrakeshin midis 2009 dhe 2015.

Ata pretenduan se Jeffries dhe Smith do të angazhoheshin në aktivitet seksual me ta ose do t’i “drejtonin” ata të bënin seks me njëri-tjetrin.

Dokumentet e zbuluara nga “BBC”, duke përfshirë biletat e fluturimit dhe itineraret e ngjarjeve, zbuluan se kishte një operacion shumë të organizuar që përfshinte një rrjet rekrutuesish dhe një ndërmjetës, James Jacobson.

A&F i tha BBC-së se ishte “tmerruar dhe neveritur” nga sjellja e pretenduar e Jeffries.

Që atëherë, marka ka pezulluar një pjesë të konsiderueshme të pagesave të tij të pensionit që arrijnë në 1 milion dollarë në vit.

Nëpërmjet avokatit të tij, Jeffries ka refuzuar gjithmonë të komentojë – ndërsa Smith nuk i është përgjigjur asnjëherë akuzave të “BBC-së”.