Java e 31-të në Superligën e Kosovës në futboll do të jetë interesante si për luftën për titull ashtu edhe për mbijetesë.

Sot (e martë) zhvillohet vetëm një ndeshje, ku Feronikeli në Drenas e pret skuadrën e Arbërisë. Momentalisht “Nikli” është në pozicion më të mirë për faktin se ka 35 pikë të grumbulluara, por mbijetesën ende nuk e ka siguruar dhe në këtë ndeshje do të hyjë për tri pikët e plota. Në anën tjetër, Arbëria, pas fitores kundër Besës në fundjavë, është e motivuar të marrë edhe një tjetër rezultat pozitiv, pasi ka grumbulluar 30 pikë dhe ka shanse të luftojë për mbetjen në elitë. Katër ndeshjet e tjera të kësaj xhiroje zhvillohen të mërkurën.

Ballkani e pret në Suharekë skuadrën e Llapit dhe synim do të ketë marrjen e tri pikëve dhe ruajtjen e pozitës së parë në elitë, të cilën e mori të dielën falë humbjes së Dritës nga Prishtina. Llapi është i koncentruar në finalen e Kupës dhe në këtë ndeshje nuk ka shumë ambicie. Prishtina e supermotivuar pas fitores në derbin e fundjavës, kërkon tri pikët e reja në përballje me Trepçën ’89, në ndeshjen që zhvillohet në stadiumin “Fadil Vokrri”.

Kampionia në fuqi, Drita, pasi e humbi pozitën e parë, do të kërkojë t’u rikthehet rezultateve pozitive në ndeshjen ndaj Besës së Pejës, kurse Drenica do të ketë punë me Gjilanin. Kjo e fundit nuk është në garë për titull e as për mbijetesë, prandaj kuqezinjtë do të mundohen të marrin pikë në Gjilan.

SUPERLIGA – Java 31

Të martën takohen:
15:00 Feronikeli – Arbëria

Të mërkurën takohen:
15:00 Prishtina – Trepça’89
15:00 Gjilani – Drenica
15:00 Ballkani – Llapi
15:00 Besa – Drita

Tabela

1. Ballkani           30      64 pikë
2. Drita                 30      64
3. Prishtina          30      63
4. Gjilani               30      43
5. Llapi                  30      39
6. Feronikeli         30      35
7. Trepça ’89        30      35
8. Drenica             30      34
9. Arbëria              30      30
10. Besa                   30      10

/Epoka e re/