Finlanda dhe Suedia presin që Hungaria të ratifikojë hyrjen e tyre në NATO

02 nëntor 16:30

Presidenti i Finlandës, Sauli Niinisto, ka thënë se llogarit në Hungarinë që ta ratifikojë aplikimin e shtetit të tij për anëtarësim në NATO.

Ai i ka bërë  këto komente më 2 nëntor pasi zhvilloi një bisedë telefonike me kryeministrin hungarez, Viktor Orban.

“Është gjë e mirë që Finlanda mund të llogarisë në Hungarinë sa i përket ratifikimit për anëtarësim në NATO. Mirëpres forcimin e mëtejmë feno-urgik, por edhe si aleatë”, ka shkruar Niinisto në “Twitter” duke iu referuar historisë së përbashkët gjuhësore të dy shteteve.

Po ashtu, ministri i Jashtëm suedez, Tobias Billstrom, ka shprehur optimizëm se Hungaria do të ratifikojë edhe aplikimin e Suedisë në NATO. Ai kishte zhvilluar një bisedë telefonike me homologun e tij hungarez, Peter Szijjarto, disa ditë më parë.

“Ne po ashtu kemi marrë mesazhe pozitive gjatë bisedës sonë”, ka thënë Billstrom gjatë një konference për media në Helsinki.

Finlanda dhe Suedia kanë kërkuar që t’i bashkohen aleancës ushtarake të NATO-s në maj, në përgjigje të pushtimit rus të Ukrainës. Por, kërkesa e tyre hasi në kundërshtime nga Turqia.

Hungaria dhe Turqia janë dy shtetet e vetme që ende nuk kanë ratifikuar aplikimet e Stokholmit dhe Helsinkit. /REL

Lajme të sponsorizuara

Të fundit
Kryetari i Komunës së Pejës, Gazmend Muhaxheri është deklaruar për…