Golden State nuk përmbahet më, fiton edhe në ato sfida ku has jo pak vështirësi siç ndodhi në përballjen me Denver Nuggets.

Kampionët në fuqi të NBA e mbyllën sfidën me rezultatin 124-114 në një ndeshje ku basketbollistët e Nuggets bënë një paraqitje mjaft të mirë, por pa mundur që të ndalin vrullin e Warriors. Stephen Curry luajti në standardet e tij duke shënuar 32 pikë në këtë përballje për Golden State që vazhdon të jetë në krye të Konferencës së Perëndimit.

San Antonio e harroi disfatën e pësuar në sekondat e fundit ndaj Portland duke mposhtur Sacramento kings 107-100. Teksanët nuk e nisën mirë këtë sfidë dhe në dy periodat e para ishte në ndjekje të rezultatit kundrejt Sacramentons.

Megjithatë Spurs arriti të kalojë momentet e vështira falë LaMarcus Aldridge me 31 pikë e 12 topa në tabelë e Davis Bertans me 28 pikë. Sacramento e pati të pamundur të ruajë avantazhin e pjesës së parë pavarësisht 22 pikëve e 9 topave në tabelë të Cauley-Stein.

Mbrëmja e radhës në NBA ishte krejtësisht për t’u harruar për Cleveland e sidomos LeBron james. Skuadra nga Ohio u mund nga Minnesota 99-127, ndërsa The King e mbylli ndeshjen me vetëm 10 pikë, 8 topa në tabelë e 5 asistime, raporton “TCH” Të vetmit që bënë diçka për të ndryshuar fatin e sfidës për Cleveland ishin Kyle Corver dhe Jeff Green që shënuan respektivisht 19 dhe 22 pikë.

Për Minnesotën që tashmë është në vendin e 4 në Konferencën e Perëndimit, spikati Andrew Wiggins me 25 pikë e 6 topa në tabelë.