Gruda i PDK-së: Qeveria ka nisur kapjen e administratës publike, mijëra zyrtarë rrezikohen të largohen nga puna

31 tetor 11:27

Koordinatori i Departamentit për Drejtësi në Kabinetin për Qeverisje të Mirë, Përparim Gruda,  të hënën në konferencë për media, ka thënë se qeveria aktuale ka nisur përpjekjet që nëpërmjet Projektligjit për Zyrtarët Publikë të Kosovës të kapë administratën publike.

Në këtë kontekst, ai ka thënë se me këtë projektligj do të largohen nga puna mijëra zyrtarë civilë që kanë pozita menaxheriale.

Ai ka thënë se kjo përpjekje e qeverisë është shantazh dhe kërcënim direkt për të vënë nën kontroll politik gjithë shërbimin civil të Kosovës.

“Qeveria aktuale pasi ka kapur çdo institucion publik duke emëruar e punësuar familjarët e tyre dhe zyrtarët partiakë në pozita drejtuese dhe në borde të institucioneve publike, tani ka nisur përpjekjet kundër kushtetuese në administratën publike. Kjo qeveri këto ditë ka prezantuar Projektligjin për Zyrtarët Publikë të Kosovës, i cili paraqet synimin e qartë të partisë në pushtet për të politizuar administratën publike të shtetit dhe për ta kthyer atë në shërbim të Lëvizjes Vetëvendosje”, ka thënë ai.

Gruda ka thënë se nëpërmjet Projektligjit për Zyrtarët Publikë të Kosovës, qeveria është duke cenuar sigurinë juridike të shërbimit civil.

“Qeveria ka paraparë që pas hyrjes në fuqi të këtij projektligji, të ju ndërpres kontratat e punës që kanë fituar sipas akt emërimeve të përhershme, të gjithë zyrtarëve të nivelit të ulët dhe të mesëm drejtues në administratën publike, të shpallë konkurse të reja për të gjitha këto pozita, dhe këto pozita të jenë me mandat 4-vjeçar. Këtu bëhet fjalë për mijëra zyrtarë që aktualisht mbajnë këto pozita. Me këtë rast, mijëra familje do të mbesin pa të ardhurat e tyre. Pra, për pozitat e të gjithë këtyre zyrtarëve do të shpallen konkurse të reja dhe atyre do të ju pushoj marrëdhënia e punës që kanë tani, për tu zëvendësuar me militantë partiak”, ka thënë Gruda.

Ai tha se në rast të miratimit dhe zbatimit të këtij projektligji, administrata publike do të politizohet, do të hapet mundësia e korrupsionit dhe siç tha ai do të bëhet e cenueshme sa herë ndërrohen qeveritë.

“Po ashtu, i bëjmë thirrje Zyrës së BE- në Kosovës që të kundërshtoj me gjithë forcën e saj këtë nismë të qeverisë për të shkatërruar administratën e shtetit. PDK-ja nuk do të lë mjet dhe rrugë demokratike pa përdorur për t’i mbrojtur shërbyesit civilë nga ky arbitraritet brutal dhe se nuk do të lejoj në asnjë mënyrë që rruga evropiane e Kosovës të pengohet nga mungesa e profesionalizmit, qëllimet jo të mira dhe synimet e qarta të kësaj qeverie për të vënë administratën e shtetit në shërbim të partisë në pushtet”, la thënë Gruda.

Ai ka thënë se vërejtjet e Zyrës së Bashkimit Evropian për këtë projektligj, qeveria aktuale nuk i ka marrë parasysh.

“Cenimi i pozitave të tilla bie ndesh me zotimet që Kosova ka marrë me Marrëveshjen për Stabilizim Asociim të lidhur me Bashkimin Evropian. Për saktësi, neni 120 i saj, përcakton mes tjerash, se Kosova merr përsipër zhvillimin e mëtutjeshëm të një administrate publike profesionale, efikase dhe të përgjegjshme në Kosovë, bazuar në përpjekjet e deritanishme të ndërmarra për reformat në këtë fushë. Vetë BE dhe SIGMA si organ i specializuar në çështjet e administratës publike brenda BE-së, kanë vënë në dukje se projektligji në formën si është prezantuar i shërben vetëm politizimit të administratës dhe korruptimit të saj për shkak të mungesës së integritetit menaxherial me mandat”, është shprehur Gruda.

Zyrtari i PDK-së ka thënë se qëllimi i qeverisë aktuale është që të vë administratën publike të shtetit, siç u shpreh ai në shërbim të partisë në pushtet.

“PDK-ja i siguron të gjithë zyrtarët publikë, qytetarët e Kosovës se nuk do të lë rrugë dhe mjet demokratik pa përdorur për të mbrojtur shërbyesit civil nga ky arbitraritet brutal dhe se nuk do të lejojë në asnjë mënyrë që rruga evropian e Kosovës të pengohet nga mungesa e profesionalizmit, qëllimet jo të mira dhe synimet e qarta të kësaj qeverie për të vënë administratën publike të shtetit në shërbim të partisë në pushtet”, ka thënë Gruda.

Lajme të sponsorizuara

Të fundit
Gabriel Jesus gjatë verës u transferua në Arsenal nga Manchester…