Ministrja e Drejtësisë, Albulena Haxhiu, në seancën e sotme të Kuvendit është përplasur me shefat e grupeve parlamentare të PDK-së dhe LDK-së për situatën në veri.

Ajo i ka akuzuar ata se po keqinformojnë kur po thonë se në veri s’ka gjyqtarë dhe prokurorë, derisa i ka pyetur edhe nëse janë në gjendje të japin dorëheqje nëse vërtetohet që s’është kështu.

“Mos i keqinformoni qytetarët. Me dalë shefi i grupit parlamentar të PDK-së dhe ai i LDK-së edhe me thënë që s’ka prokurorë dhe gjyqtarë në veriun e vendit tonë, shumë pak është me thënë keqinformim. Po i keqinformoni dhe po inkurajoni dhunuesit”.

“A je në gjendje zotëri Tahiri me dhënë dorëheqje nëse ajo çka ke thënë ti është e pavërtetë. Tash jam e gatshme që bashkë me ty dhe Arbenin të shkojmë në Mitrovicë në prokurori dhe gjykatë. Aty janë prokurorët dhe aty janë gjyqtarët, prandaj mos shpifni”, ka thënë Haxhiu.

Haxhiu ka thënë se për herë të parë Kosova ka pozicion të dinjitetshëm në raport me negociatat me Serbinë, “diçka që s’e kemi parë me herët”.

“Për herë të parë tre krerët e institucioneve janë të unifikuar me qëndrimet e tyre përballë Serbisë. Sigurisht që do të doja që këtij unifikimi t’i bashkohet edhe opozita”, ka thënë ajo.