Inspektorati Policor i Kosovës (IPK) ka bërë me dije se sipas të gjeturave tani për tani nuk ka elemente të ndonjë veprimi apo mosveprimi të kundërligjshëm nga zyrtarët policorë nga Drejtoria rajonale e policisë së Gjakovës lidhur me tragjedinë në Brekoc të Gjakovës, ku një person pati vrarë bashkëshorten dhe vajzën e tij.

“Më datën 07.08.2018, në orët e pasdites viktima V. M. Ndrecaj së bashku me vëllain e saj kishte kontaktuar zyrtarët policorë të Drejtorisë rajonale të Gjakovës duke potencuar para hetuesve se kishte pranuar disa mesazhe elektronike, ku pos mesazhit kërcënues kishte edhe mesazhe me përmbajtje të lutjes për t’u kthyer viktima në familje, nga i dyshuari P. Ndrecaj – bashkëshorti i saj. I dyshuari në datën e njëjtë  kishte shkuar te shtëpia e prindërve të viktimës së bashku me disa të afërm të tij dhe  kishte kërkuar nga e njëjta që të kthehet te shtëpia e tij në fshatin Bitesh”, është thënë në komunikatën e IPK-së.

Sipas kësaj komunikate, pas intervistimit  të viktimës nga hetuesit policorë, të njëjtit janë konsultuar me prokuroren kujdestare dhe kanë iniciuar rastin “kanosje” ndaj të dyshuarit P. Ndrecaj. “Pas hapjes së rastit, hetuesit e stacionit policor në Gjakovë kanë filluar ndërmarrjen e veprimeve operative, ku fillimisht kishin shkuar në fshatin Bitesh te shtëpia e të dyshuarit me qëllim të shoqërimit të tij në polici për ta intervistuar lidhur me rastin ‘kanosje’. Pasi hetuesit e Stacionit Policor në Gjakovë të dyshuarin nuk e kishin hasur në shtëpinë e tij, të njëjtin janë munduar që ta kontaktojnë nëpërmjet telefonit, por i dyshuari nuk ishte përgjigjur në telefon”, është thënë në këtë në komunikatë.

Duke i’u referuar shkresave të rastit nga Policia e Kosovës, IPK-ja ka bërë me dje se është vërtetuar se viktima as në datën kritike nuk kishte kërkuar mbrojtje nga ana e zyrtarëve policorë. “E gjithë kjo përpjekje e zyrtarëve policorë të Stacionit Policor në Gjakovë për ta hasur dhe kontaktuar të dyshuarin P. Ndrecaj ka vazhduar deri pas orës 18:30 të datës 7 gusht. Për gjitha këto veprime të ndërmarra nga zyrtarët policorë, të njëjtit kanë informuar po atë ditë prokuroren kujdestare të PTH-Gjakovë, ku nga prokurorja kujdestare nuk është kërkuar ndonjë veprim shtesë lidhur me këtë rast”.

“IPK-ja konstaton se sipas të gjeturave rezulton se tani për tani nuk ka element të ndonjë veprimi apo mosveprimi të kundërligjshëm nga ana e zyrtarëve policor nga Drejtoria rajonale e policisë së Gjakovës. Këto të gjetura që hetuesit e IPK-së i kanë identifikuar si rezultat i veprimeve hetimore dhe dokumentacioneve të siguruara nga Policia e Kosovës i janë prezantuar kryeprokurorit të Prokurorisë Themelore të Gjakovës dhe i njëjti ka potencuar se tani për tani nuk ka element të ndonjë veprimi apo mosveprimi të kundërligjshëm nga ana e zyrtarëve policor nga Drejtoria Rajonale e Policisë së Gjakovës”, është thënë në komunikatën e IPK-së.

/Epoka e re/