Ish-komandanti i Forcës së Sigurisë së Kosovës (FSK), Kadri Kastrati, ka thënë se Qeveria e Kosovës do ta ketë të pamundur ta mbajë nën kontroll situatën në pjesën veriore të vendit, duke mbajtur policinë atje.

Sipas tij, qeveria duhet të nisë menjëherë bashkëpunimin me përfaqësuesit ndërkombëtarë, në mënyrë që të krijohet një strategji e qartë për shtensionimin e situatës dhe vendosjen e rendit dhe ligjit në veri.

Partnerët kryesorë për Qeverinë e Kosovës, sipas Kastratit, janë përfaqësuesit amerikanë dhe KFOR-i.

“Duhet të ulen dhe ta studiojnë këtë situatë me KFOR-in, sepse i vetmi institucion që mund ta mbajë situatën të qëndrueshme në atë pjesë, është KFOR-i”, ka thënë Kastrati për “Radion Evropa e Lirë”.

Sa i takon shtimit të prezencës së KFOR-it në afërsi të objekteve komunale në Zveçan, Zubin Potok dhe Leposaviq, Kastrati tha se ky mision është në mbështetje të Policisë së Kosovës.

“KFOR-i nuk e thotë haptas, por është në mbështetje të Policisë së Kosovës për të ruajtur rendin dhe qetësinë, në mënyrë që ajo pjesë të mos bllokohet prapë, të mos vendosen barrikada dhe të mos ndodhë më e keqja, sepse atje ka serbë të armatosur, këtë e dimë të gjithë”, ka thënë Kastrati, duke shtuar se destabilizimi i veriut të Kosovës është qëllim i Serbisë.

“Serbia është duke dashur që ta ndajë veriun e Kosovës. Këtë e ka synim. Pra, synimi i saj është që të mos i lejojë institucionet e Kosovës në atë pjesë të funksionojnë. Kjo po dihet”, ka thënë ai.

Duke komentuar veprimet e Policisë së Kosovës për të asistuar futjen në objekte komunale të kryetarëve të rinj, gjenerali Kastrati ka thënë se policia është treguar profesionale dhe se ka zbatuar detyrat e dhëna nga ekzekutivi.