KDI-ja: Raportimet për ecurinë e dialogut në Kuvend të jenë të rregullta

10 qershor 17:35

Instituti Demokratik i Kosovës (KDI) e ka vlerësuar raportimin e kryeministrit të Kosovës, Albin Kurti, që do të mbahet në seancën e sotme (e premte) të Kuvendit, para takimit të dialogut me Serbinë të ndërmjetësuar nga Bashkimi Evropian (BE).

KDI-ja ka theksuar se kryeministri duhet të raportojë në Kuvend edhe pas kthimit nga ky takim që pritet të mbahet në Bruksel më 15 qershor.

“KDI-ja konsideron që praktika e raportimit në Kuvend para dhe pas çdo takimi në kuadër të procesit të dialogut Kosovë-Serbi është e domosdoshme dhe në funksion të garantimit të transparencës dhe llogaridhënies ndaj Kuvendit, por edhe qytetarëve në përgjithësi. Në kuadër të raportimit të nesërm, presim nga kryeministri Kurti që të prezantojë në Kuvend parimet dhe pritshmëritë e qeverisë nga ky proces si dhe pozicionin që do ta artikulojë Kosova në takimin e Brukselit. Gjithashtu, presim që kryeministri të raportojë për takimet e mbajtura me funksionarët e lartë evropian dhe amerikan lidhur me procesin e dialogut. Në këtë seancë duhet të bëhet i ditur edhe plani i Qeverisë lidhur me marrëveshjet tashmë të arritura, përfshirë qëndrimin për zotimet e Uashingtonit. Në të njëjtën kohë, presim që kryeministri Kurti që të informojë deputetët lidhur me hapat e mëtutjeshëm të Qeverisë për ndërtimin e konsensusit politik si dhe konsultimin e qytetarëve për këtë proces”, është thënë në komunikatën e KDI-së.

Ky institut u ka bërë thirrje deputetëve të Kuvendit që të jenë më proaktiv në ushtrimin e funksionit mbikëqyrës ndaj procesit të dialogut, duke mbajtur qeverinë llogaridhënëse.

Lajme të sponsorizuara

Të fundit
Ministria e Shëndetësisë e Shqipërisë ka bërë me dije se…