Këshilltari kryesor i presidentit Erdogan viziton ShSKUK-në
Kryesuesja e Bordit Drejtues të Shërbimi Spitalor Klinik dhe Universitar të Kosovës (ShSKUK), Aida Rexhepi dhe drejtori i përgjithshëm, Valbon Krasniqi, kanë pritur në takim një delegacion nga Turqia, në shoqërim të së cilit ishte edhe deputetja e Kuvendit të Kosovës, Duda Balje dhe Jakuta Haskuka, koordinatore ndërmjet dy shteteve.
Gjatë takimit me Ordus Yalcin Topcu, këshilltar kryesor i presidentit të Turqisë, Recep Tayyip Erdogan, si dhe deputetin Metin Gundogdu, është biseduar në lidhje me mundësitë e investimit të shtetit të Turqisë, përmes TIKA-s turke, në Institutin e Onkologjisë, përkatësisht në bunkerin e ri.
Kryesuesja e bordit drejtues, Aida Rexhepi, pasi ka falënderuar delegacionin për vizitën, ka shprehur bashkëpunimin dhe përkrahjen e bordi drejtues, për realizim të projekteve të reja.
Drejtori Krasniqi para delegacionit nga Turqia prezantoi punën që bëhet në Klinikën e Onkologjisë, duke përmendur edhe nevojën që ka kjo klinikë për investime shtesë në bunkerë, meqë është rritur numri i pacientëve dhe përkundër investimeve të bëra së fundmi.
Ai tregoi se brenda dite në Onkologji, kemioterapinë e marrin 200 deri në 250 pacientë, kurse një numër i madh i tyre i nënshtrohen edhe radioterapisë dhe brahiterapisë, e cili shërbim është funksionalizuar në QKUK.
Yalcin Topcu, deputet dhe këshilltar i parë i presidentit të Turqisë ka theksuar se kanë pranuar kërkesën përmes deputetes Duda Balje për investime, duke shtuar se shteti turk është duke shqyrtuar mundësitë që përmes TIKA-s, të përkrahë realizimin e bunkerit në Klinikën e Onkologjisë.
Po ashtu, edhe deputeti Gundogdu ka premtuar angazhimet konkrete që po bëhen në Turqi për të mbështetur realizimin e këtij projekti.
Delegacioni nga Turqia, i shoqëruar nga drejtori i ShSKUK-së dhe kryesuesja e Bordit Drejtues, kanë vizituar Klinikën e Onkologjisë dhe janë njohur për së afërmi me punën që bëhet në këtë klinikë dhe nevojën për investime të reja.