Ankesa e kadetëve të shkolluar në Turqi është arsye pse Komisioni për Punë të Brendshme ka ftuar në raportim ministrin e Punëve të Brendshme, Ekrem Mustafa.

Anëtari i këtij komisioni nga radhët e PDK-së, deputeti Fatmir Xhelili, ka thënë se mospunësimi i këtyre njerëzve që kanë fituar dije jashtë vendit është i papranueshëm.

Xhelili i ka rekomanduar MPB-së që të gjejë një formë që t’i punësojë këta 11 persona që për 5 vite janë shkolluar në Turqi.

Ndërsa, deputeti i Vetëvendosjes, Rexhep Selimi, ka deklaruar se është i shqetësuar me këtë padrejtësi qe po u bëhet atyre.

Në anën tjetër ministri i Punëve të Brendshme, Ekrem Mustafa, ka thënë se është i njoftuar me këtë rast prej nëntorit të vitit të kaluar.

Sipas tij faj ka legjislacioni që nuk i ka mundësuar punësim ad – hoc nëpër institucione, pasi ky grup i personave kanë refuzuar që të punësohen në disa institucione, por të njëjtit kanë refuzuar diçka të tillë meqë kanë kërkuar që të punësohen me uniformë.