Kryeprokurori i Prokurorisë së Specializuar të Dhomave të Specializuara të Kosovës, Jack Smith,  e ka quajtur ditë të rëndësishme nisjen e procesit të parë gjyqësor në këtë institucion.

Ai në fjalën e tij ka thënë për të akuzuarit Sali Mustafa se të gjitha viktimat e krimeve që ai dyshohet se i ka kryer janë me kombësi shqiptare.

“Mustafa ka shkelur ligjet e luftës dhe ligjet ndërkombëtare për mbrojtje të individëve. ZPS-ja nuk ngrit akuza ndaj UÇK-së as luftës së bërë për pavarësi”.

“Ata që janë përpjekur t’i frikësojnë dëshmitarët, kanë pretenduar se këto gjyqe bëhen kundër popullit të Kosovës dhe kjo nuk është e vërtetë. Fakti që populli i Kosovës vendosi ta krijojë këtë institucion përbën dëshmi për angazhimin e shtetit ligjor. Ky gjyq ka të bëjë me përgjegjësi vetjake të Mustafës veprimet e të cilit kanë shkaktuar vuajtje në trupat dhe mendjet e viktimave që kanë vuajtur nga këto veprime”, ka thënë Smithi.

Smithi ka thënë se arsyeja  e krijimit të Gjykatës Speciale është atmosfera e frikësimit të dëshmitarëve që sipas tij ekziston edhe sot.