Trajneri i xhudos, Driton Kuka ka thënë se medaljet e arta olimpike të fituara tregojnë se Kosova është në gjendje të garojnë ndaj gjithë botës me punë dhe përkushtim të madh.

Distria Krasniqi dhe Nora Gjakova rrëmbyen medaljet e arta në Lojërat Olimpike “Tokio 2020”. Ndërsa në Lojërat Olimpike “Rio 2016”, Majlinda Kelmendi e fitoi medaljen e artë.

“Fatkeqësisht, Majlinda e pati dje një ditë jo të mirë. Arsyeja pse kam dashtë që Majlinda me garuar në lojëra olimpike, është ekipore. S’kam dashtë me e prishë konceptin e ekipit. Medalja e sotme e artë është me të vërtetë e jashtëzakonshme, por Majlindën duhet ta falënderoj sepse ka meritë të jashtëzakonshme”, ka thënë Kuka

“Çdo garë, çdo medalje për Kosovën është rezultat i madh. Tash çka me menduar për dy medalje të arta olimpike edhe atë të Majlindës. Një lagje e vogël në Kosovë i ka tregu krejt botës që me punë e përkushtim mundemi me u shty me të gjithë. Kemi qenë shpirtërisht shumë të thyer dhe kjo pak ndoshta po e zbehë krejt festën e fitores së Norës sot dhe të gjithë të plagosurve u dëshiroj shërim të shpejtë. Kjo tregon se sa ne shqiptarët e duam vendin tonë dhe çfarë jemi në gjendje të bëjmë për atdheun tonë”, ka shtuar Kuka.