Përderisa bënte homazhe për 23-vjetorin e masakrës së Krushës së Madhe, kryeministri Albin Kurti është ndalur nga ish-diplomatja Bahrije Hoti, e cila ishte pjesë e Misionit Konsullor të Republikës së Kosovës në Bern.

Ajo ka kërkuar nga kryeministri shpjegime se përse është shkarkuar nga pozita që mbante, mirëpo ky i fundit nuk ka mundur të japë një sqarim, por i ka premtuar që do të interesohet për këtë gjë.

Bahrije Hoti u prezantua si motër dëshmori para kryeministrit Kurti gjatë vizitës së tij në Krushë të Madhe. Në llogarinë e saj personale në Facebook, ajo ka shkruar se si pasojë e masakrës në Krushë të Madhe 23 vjet më parë, ka humbur babanë, vëllanë dhe nipin.

“Lavdi Baba, Vёlla, Nip dhe ju tё gjithё bashkfshatarё tё Krushёs qё ratё nё altarin e Lirise pёr mos tё vdekur kurrë!”, ka shkruar Hoti.

Lidhur me shkarkimet e MPJD-së ka pasur disa reagime. Ministria dhe ministrja Gërvalla janë akuzuar se në mënyrë të parregullt kanë lëshuar vendimet për shkarkimin e diplomatëve në misionet e jashtme nëpër botë.