Ministri në detyrë i Zhvillimit Ekonomik nga AKR-ja, Valdrin Lluka, në një intervistë për “Zërin” ka deklaruar se koalicioni Nisma-AKR-PD do të jetë fuqi vendimmarrëse për formimin e qeverisë së ardhshme pas zgjedhjeve të 6 tetorit.

Sipas tij, secila matematikë e partive të mëdha kërkon edhe përfshirjen e këtij koalicioni për ta formuar një qeveri të shumicës.

Cilado qoftë matematika e partive të mëdha pas zgjedhjeve të 6 tetorit, do t’i nevojiten edhe votat e koalicionit të subjekteve të vendit, të Nismës – AKR-së dhe PD-së, koalicion ky që do të jetë përcaktues për formimin e qeverisë së ardhshme.

Kështu ka deklaruar ministri në detyrë i Zhvillimit Ekonomik Valdrin Lluka, nga AKR-ja, i cili për “Zërin” ka thënë se pret që partia e tij të jetë fuqi vendimmarrëse për formimin e qeverisë së re, sikurse në zgjedhjet e kaluara.

“Qeveria e ardhshme nuk do të duhet t’i ketë më pak se 60 deputetë shqiptarë në mënyrë që të kalohen edhe proceset madhore për vendin, por edhe që të kemi një stabilitet më të madh në Qeveri. E për t’i bërë 60 deputetë shqiptarë prapëseprapë pa koalicionin AKR – Nisma – PD do të jetë e pamundur, sepse çdo matematikë, secili koalicion që mund të bëhet, tregon se nuk mund të bëhen më shumë se 50 ose 55 deputetë”, ka thënë Lluka.