Rusia po përgatitet për fazën e mëtejshme të ofensivës së saj në Ukrainë, tha një zyrtar ushtarak ukrainas, pasi Moska tha se forcat e saj do të intensifikojnë operacionet ushtarake në “të gjitha zonat operacionale”.

Ndërsa dërgesat perëndimore të armëve me rreze të gjatë veprimi fillojnë të ndihmojnë Ukrainën në fushën e betejës, raketat ruse kanë goditur qytetet në sulme që Kievi thotë se kanë shkaktuar vdekjen e 40 personave që nga e enjtja.

“Nuk janë vetëm sulme me raketa nga ajri dhe deti,” tha të shtunën Vadym Skibitskyi, një zëdhënës i zbulimit ushtarak ukrainas. “Ne shohim predha përgjatë gjithë linjës së kontaktit, përgjatë gjithë vijës së frontit. Po përdoren aktivisht aviacioni taktik dhe helikopterë sulmues.”

Ushtria ukrainase tha se Rusia dukej se po riorganizonte njësitë për një ofensivë ndaj Slovianskut, një qytet në rajonin lindor të Donetskut.