Marmarinos: Të gjithë do të krenohen me Kosovën

15 korrik 2020 | 09:16

Përzgjedhësi i Përfaqësueses së Kosovës, Christos Marmarinos, ka thënë se qëllimi i tij është që të gjithë shqiptarët e Kosovës të krenohen me Përfaqësuesen e basketbollit.

Kosova A te meshkujt do të grumbullohet në muajin gusht. Grumbullimi do të jetë disaditorë dhe me mundësi edhe një ndeshje miqësore. Ky grumbullim do të mbahet në Prishtinë dhe është i mirëseardhur për përzgjedhësin e Kosovës, Christos Marmarinos. “Është e rëndësishme që kampi të mbahet në gusht, kështu që ne ta shohim formën e lojtarëve tanë pas karantinës. Ne dëshirojmë të luajmë një rol aktiv në jetën e tyre dhe të ndihmojmë në karrierën e tyre në mënyrën më të mirë të mundshme. Do të kemi disa ditë stërvitje, do të sigurohemi që të gjithë t’ia kujtojmë vetes strukturën e ekipit dhe duhet të funksionojmë për të ardhmen. Ne dëshirojmë që ata të ndihen si në shtëpi kur janë me ekipin përfaqësues”, është shprehur Marmarinos për faqen zyrtare të FBK-së. Ai ka folur edhe për rëndësinë që ky grumbullim ka për lojtarët e Kosovës.

“Ne presim ta vlerësojmë përparimin e lojtarëve. Ne do t’u japim mundësi të tjerëve që të jenë pjesë e ekipit përfaqësues. Ekipi nuk është një grup i mbyllur njerëzish, por një familje e gjerë që mund t’i përfshijë të gjithë ata që ndajnë të njëjtat vlera dhe parime. Në një mjedis më të qetë, lojtarët do ta kenë mundësinë të tregojnë vlerën e tyre dhe t’i njohin standardet e ekipit. Në këtë mënyrë, kur të vijë koha në nëntor ne do të zgjedhim mes lojtarëve që janë në formën më të mirë, pa përjashtuar askënd nga procesi”, ka shtuar tutje Marmarinos.

Kosova në parakualifikimet evropiane për Botërorin 2023 ka mundur në shtëpi Islandën 80:78 dhe Luksemburgun në udhëtim 80:84. Në muajin nëntor, Dardanët janë mysafirë të Sllovakisë dhe Islandës. “Synimi ynë është të luajmë për fitore. Fitorja është pjesë e rëndësishme për ne dhe ne duam ta bëjmë çdo kosovar në botë të krenohet me ekipin përfaqësues. Në të njëjtën kohë, krijimi i një ‘mentaliteti të Basketbollit të Kosovës’ është po aq i rëndësishëm dhe fitorja në këtë sektor do ta frymëzojë dhe formojë gjeneratën e re të njerëzve të basketbollit në vend. Ky është qëllimi ynë më i madh dhe kjo do të jetë fitorja përfundimtare. Deri atëherë, ne do të luftojmë në çdo ndeshje për fitore”, ka deklaruar Marmarinos.

Lajme të sponsorizuara

Të fundit
Me rritjen e numrit të infektuarve në vend me Covid-19,…