Dëmet nga vërshimet që janë shkaktuar në bujqësi në Rahovec në vitin që lamë pas do të kompensohen nga Qeveria e Kosovës. Ndërkohë sa i përket masave për parandalimin e dëmeve të tilla pritet të bëhet një plan.

Buxheti që kjo komunë ka ndarë në bujqësi, fushë kjo që e ka më të zhvilluarën, është mbi një milion euro.

Kryetari i kësaj komune, Smajl Latifi, në një intervistë për “Kosovapress” ka folur edhe për arsimin në këtë komunë, duke bërë me dije edhe për çerdhet që do ndërtohen.

Latifi ka e vlerësuar si sukses të qeverisjes së tij zonën ekonomike prej 36 hektarë në Opertushë të Rahovecit, zonë kjo që siç ka thënë ai, do të ndikojë në tërheqjen e investitorëve, zhvillimin ekonomik të Rahovecit dhe në punësimin e qytetarëve.

Për këtë të arritur por edhe për të tjera projekte, kryetari Latifi ka thënë se ka marrë mbështetjen e Qeverisë.