Autoritetet në rajonin e Krasnoyarsk të Rusisë planifikojnë të mbyllin disa burgje këtë vit për shkak të reduktimit të numrit të të burgosurve. Këta të fundit janë rekrutuar për të luftuar në Ukrainë, raportoi sot gazeta Kommersant.

Kommersant shkruan se Mark Denisov, komisioneri për të drejtat e njeriut në rajonin Krasnoyarsk, duke folur në parlamentin rajonal, tha se të paktën dy burgje lokale do të mbyllen për shkak të “një ulje të madhe të numrit të të dënuarve pas operacionit ushtarak special në Ukrainë”.

Rusia filloi të rekrutonte të burgosur për të luftuar në Ukrainë nga viti 2022, kur Yevgeny Prigozhin, lideri i ndjerë i grupit mercenar Wagner, filloi të vizitonte kolonitë penale, duke u ofruar të burgosurve një falje nëse mbijetonin gjashtë muaj në front.

Prigozhin, i cili u vra në një aksident avioni vetëm disa muaj pas një rebelimi jetëshkurtër kundër udhëheqësve ushtarakë të Rusisë, kishte thënë se kishte rekrutuar 50,000 të burgosur për Wagner.

Në atë kohë, të dhënat e publikuara nga shërbimi i burgjeve të Rusisë treguan rënie të papritur në popullsinë e burgjeve të vendit.

Ministria ruse e mbrojtjes që atëherë ka vazhduar të rekrutojë të dënuar nga burgjet për formacionet e veta të njohura si Storm-Z.