Mehaj: Dronët, shpifje e Vuçiqit për të përhapur panik te qytetarët

01 nëntor 22:46

Ministri i Mbrojtjes, Armend Mehaj, i ka quajtur të pavërteta deklarimet e presidentit serb, Aleksandar Vuçiq, për gjoja lëvizjen e dronëve të panjohur nga territori i Republikës së Kosovës mbi vendbanimin e Rashkës në Serbi.

Mehaj, duke i quajtur plotësisht të pavërteta pretendimet e presidentit serb, Vuçiq, ka thënë se “çfarëdo diskursi i tillë është vetëm pretekst për rritjen e numrit të trupave të ushtrisë serbe përreth kufirit me Republikën e Kosovës, si mjet për përhapjen e një gjendje paniku mbi qytetarët e të dyja shteteve”.

“Fillimisht për tentim kthimin e vëmendjes në një temë që nuk është më brengë e qytetarëve të Serbisë, të cilët tashmë kanë pranuar realitetin e ri të shtetit të Kosovës, dhe pakënaqësitë e tyre kanë të bëjnë më tepër me mirëqenien e tyre nën udhëheqjen e Vuçiq, sesa me rezultatet e dialogut”, ka shkruar Mehaj në një postim në “Facbook”.

Sipas Mehajt, pretendimet e presidentit serb, kanë për qëllim tentim destabilizimin e Republikës së Kosovës “përmes ngjalljes së frikës tek komuniteti serb, qytetarët tanë, për gjoja masat e dhunshme që priten të ndërmerren nga ana e institucioneve të qeverisë, tek të gjithë ata që përdorin targa ilegale të Serbisë, e të cilat ua rikujtojmë se janë të tilla, ilegale, pasi janë në kundërshtimin me marrëveshjen e derivuar nga dialogu në mes të dyja palëve, si dhe në kundërshtim me vendimin e qeverisë së Republikës së Kosovës, të datës 28.10.2022, në të cilin është vendosur që procesi i regjistrimit të këtyre mjeteve në targa RKS të bëhet i shkallëzuar në tre faza, deri në përmbylljen e këtij procesi legal dhe legjitim me datë 21 prill 2023”.

“Duam të sigurojmë të gjithë qytetarët e Republikës së Kosovës se ashtu siç janë njoftuar edhe më parë nga Ministria e Punëve të Brendshme, ky proces ka për synim  ligjshmërinë në shtetin tonë, rritjen e sigurisë në trafik, dhe nuk është i drejtuar ndaj asnjë etnie të caktuar”, ka thënë Mehaj.

Më tej, ai ka thënë se “të gjithë qytetarët që kanë pasur në shfrytëzim tabela të tilla deri me datën 31 mars 2023, do të kenë mundësi të përfitojnë nga lehtësirat për regjistrim të mjeteve nga targa ilegale në targa RKS, duke përfshirë: taksat doganore, taksën administrative në Qendrën e Regjistrimit të Automjeteve, tarifën për targa dhe tarifën për pajisje me certifikatë të regjistrimit të automjetit”.

“Respektimi i këtyre masave do të sigurohet nga ana e Policisë së Republikës së Kosovës, si rregulluese e trafikut. Ndërsa ushtria e Republikës së Kosovës, padyshim do të garantojë mbrojtjen e të gjithë shtetasve brenda territorit të Republikës së Kosovës”.

“Çdo veprim i yni është në koordinim të plotë me aleatët tanë, në mbrojtje të  integritetit territorial dhe vlerave demokratike evropiane”.

Ndryshe, mediat serbe kanë shkruar sot se presidenti i Serbisë, Aleksandar Vuçiq, e ka urdhëruar ushtrinë e tij që t’i lëshojë disa avionë luftarakë për t’i shkatërruar “dronët e armikut”, të cilët thonë se vëzhguan pozicionet e ushtrisë serbe, e cila sot u urdhërua të vendoset në gjendje gatishmërie.

Siç shkruajnë mediat më të afërta me Vuçiqin, ky i fundit ka lëshuar urdhër zyrtar që “dronët e armikut” në afërsi të kufirit me Kosovën “të asgjësohen menjëherë”.

“Vuçiq vendosi ta ndërmarrë këtë hap pas incidentit që ndodhi në zonën mbi Merdar dhe në afërsi të Rashkës, kur dronët e panjohur vëzhguan kazermat dhe pozicionet e Forcave të Armatosura Serbe”, ka shkruar gazeta serbe “Politika”.

Lajme të sponsorizuara

Të fundit
Bayern Munchen ka dyfishuar avantazhin 2:0 kundër Interit. Choupo-Moting ka…