Kancelarja gjermane, Angela Merkel dhe presidenti i Turqisë, Rexhep Taip Erdogan kanë biseduar për situatën në verilindje të Sirisë.

“Ata janë pajtuar që të vazhdojë të jenë në kontakt të ngushtë për këtë çështje”, ka thënë një zëdhënëse e Qeverisë gjermane, e cila ka njoftuar për bisedën telefonike ndërmjet kancelares Merkel dhe presidentit Erdogan, por nuk ka dhënë më shumë detaje lidhur me përmbajtjen e bisedës.

Turqia ka kryer një ofensivë ushtarake në veri të Sirisë, me qëllim që të largojë nga ajo zonë luftëtarët kurdë, të cilët i konsideron terrorist.

Koalicioni qeverisës në Gjermani ka pasur dyshime se si të përgjigjet lidhur me ofensivën turke. Socialdemokratët kanë kundërshtuar një propozim të ministres së Mbrotjes, Annegret Kramp-Karrenbauer që të krijohet një “zonë e sigurt” nga Kombet e Bashkuara, në zonën kufitare Siri-Turqi.

Ofensiva turke në Siri është ndërprerë pas arritjes së një marrëveshjeje armëpushimi, të cilën e kanë ndërmjetësuar Shtetet e Bashkuara dhe Rusia.

Turqia dhe Rusia po ashtu kanë arritur një marrëveshje që të largojnë për 30 kilometra nga kufiri Turqi-Siri, luftëtarët kurdë.