Ministri Bytyqi: Të punojmë së bashku për nxitjen e diversitetit në shkolla

11 tetor 12:42

Ministri i Arsimit, Shkencës dhe Teknologjisë, Shyqiri Bytyqi, mori pjesë në konferencën përmbyllëse të projektit “Nxitja e kulturës demokratike dhe e diversitetit në shkollë”, projekt ky i bashkëfinancuar nga Bashkimi Evropian dhe Këshilli i Evropës.

Ky projekt është zbatuar në 20 shkolla pilote dhe përgjatë dy viteve kanë marrë pjesë rreth 200 përfaqësues, përfshirë drejtorë, mësimdhënës, prindër dhe pjesëmarrës të komuniteteve.

Ministri Bytyqi ka falënderuar BE-në dhe Këshillin e Evropës për mbështetjen në këtë projekt që i ka kontribuar rritjes së cilësisë në shkollat tona.

“Ky projekt i ka kushtuar një rol të rëndësishëm dhe të veçantë krijimit të një kulture demokratike dhe nxitjen e diversitetit nëpër shkollat tona, një çështje shumë e rëndësishme dhe një përpjekje shumë e madhe edhe e partnerëve tanë, por edhe e MAShT, që të kemi shkolla sa më të zhvilluara”, ka thënë ai.
Ministri Bytyqi ka përmendur faktin se në kuadër të këtij projekti është bërë edhe trajnimi i mësimdhënësve, me qëllim të mbështetjes së sistemit arsimor në Kosovë.

“Si rezultat i këtij projekti, janë rritur aftësitë e mësimdhënësve trajnerë për të ndihmuar dhe monitoruar proceset demokratike dhe gjithëpërfshirëse në zhvillimin e shkollave”, është shprehur ministri Bytyqi, duke theksuar se tash kur ky projekt po përfundon.

“Trajnerët janë të gatshëm për t’u angazhuar në proceset konkrete të zhvillimit të shkollave dhe do të lehtësojnë zhvillimin e proceseve përmes dhënies së trajnimit në nivel vendor dhe rajonal për ekipet e shkollave të zgjedhura pilot të angazhuara ndaj proceseve të zhvillimit profesional. Ky projekt ka nxjerrë në pah që politikat, rregullat dhe praktikat shkollore duhet të hartohen në mënyrë të tillë që të ndalojnë dhe të parandalojnë diskriminimin e drejtpërdrejtë dhe të tërthortë”, ka thënë ministri Bytyqi.

Ministri ka theksuar edhe rolin e prindërve në këtë proces.

Bytyqi ka thënë se prindi duhet të jetë gjithmonë pjesëmarrës në zgjidhjen e këtyre çështjeve, pasi sipas tij ata janë edukatorët kryesorë të fëmijëve dhe e dinë më së miri se cilat janë kërkesat e fëmijëve të tyre për t’i zgjidhur problemet që paraqiten ndaj diskriminimeve të caktuara.

/Epoka e re/

Lajme të sponsorizuara

Të fundit
Ministri i Punëve të Brendshme, Bejtush Gashi, ka vizituar sot…