Ministri gjerman i Shëndetësisë, Jens Spahn ka deklaruar se presidenti i SHBA, Donald Trump nuk gabon në insistimin e tij që Organizata Botërore e Shëndetësisë duhet të reformohet.

Në një intervistë me  “Financial Times”, ministri i Shëndetësisë Jens Spahn theksoi se Trump, i cili ka kërcënuar të ndërpresë fondet nëse OBSH nuk bën ndryshime të mëdha, “ka të drejtë”.

“Ne duhet të kuptojmë saktësisht se ku shkojnë paratë,” tha ai, duke shtuar se reformat duhet të synojnë “qeverisjen dhe përgjegjshmërinë e OBSH”.

Sidoqoftë, Spahn theksoi se për këto diskutime duhet të prisnin derisa të kalonte pandemia.

“Në mes të një krize, kur zjarret janë duke u shuar, nuk flitet për reformimin e zjarrfikësve”, theksoi Spahn duke shtuar se do të ishte “shumë keq” që SHBA të linin organizatën.

Spahn, 40 vjeç, shpesh diskutohet si pasardhës i mundshëm i kancelares Angela Merkel.