Nëse ekziston dikush që ka nisur ta shijojë rikthimin në skuadër, ai është pa dyshim Thomas Muller.

Mesfushori gjerman i Bayernit luajti disa minuta në përballjen me Kolnin duke dhënë edhe asistim për skuadrën e tij në një nga pesë golat e shënuara. E hëna ishte ditë pushimi për skuadrën, por jo për Mullerin. Në një ditë me diell në qiellin e Mynihut, 31-vjeçari u shfaq i vetëm në qendrën stërvitore i shoqëruar nga trajneri i dytë. Vrapime, ushtrime, streçing dhe goditje në portë ishte programi i ditës. Ndërkohë, kjo nuk u kalua pa u vënë re nga pjesa tjetër e skuadrës e cila, edhe pse nuk zbriti në fushë, qëndronte në ambientet e klubit për fizioterapi.

Robert Lewandowski ishte një prej tyre i cili, i buzëqeshur, shihte teksa Muller djersiste dhe “vuante” i vetëm në fushë. Në mungesë të punëtorëve të fushës, Mullerit iu desh t’i mbante topat i vetëm, një skenë humori e cila nuk u shpëtoi fotografëve dhe gazetarëve të cilët ndodheshin në ambientet e klubit.

“Bild” e cilësoi stërvitjen e Mullerit si një tregues i qartë i vullnetit dhe dëshirës që ai ka për të luajtur dhe shërbyer skuadrës. Covidi e la atë dy javë jashtë fushave duke i mohuar lojtarit pjesëmarrjen në finalen e Kupës së Botës për Klube. Por, Thomas është një luftëtar, i gatshëm të rikthehet në momentin më të rëndësishëm për skuadrën.

Ndërkaq, lajmet për një rikthim në kombëtare sa vijnë dhe shtohen, duke marrë shkas edhe nga fjalët e trajnerit të kombëtares, Joachim Low, i cili u shpreh se kishte ardhur momenti që Mulleri të rikthehej në kombëtare për t’i sjellë skuadrës energji të reja. Këto fjalë para Evropianit i kanë dhënë një impuls më shumë lojtarit i cili realisht do të ishte një armë më shumë për “Pancerat”.

Teksa klasikja me Borusisa Dortmundin po afrohet, nuk mungoi edhe një batutë e ish-kampionit të botës, teksa po dilte nga fusha e stërvitjes: “Kundër Dortmundit është një ndeshje të cilën e luajmë si të ishte një finale. Sfida të tilla janë motivim për ne. Duam të tregojmë që jemi kampionët në fuqi dhe se titulli duhet të vijë sërish në Munchen në fund të sezonit”. Mesazhi i Mullerit është i qartë, edhe në këtë përballje Bayerni është favorit për të fituar ndaj rivalit të përjetshëm në Gjermani.