Muriqi: E kam përjetuar luftën, kam parë gjëra që s’do të donte t’i shihte asnjë njeri
Vedat Muriqi është kthyer prapa në kohë duke e kujtuar fëmijërinë e tij të vështirë. Sulmuesi kosovar, në një intervistë për “Radioestadio”, e ka kujtuar edhe kohën e luftës në Kosovë, të cilën e kishte përjetuar.
I emocionuar, 28-vjeçari i ka kujtuar ato momente, të cilat nuk do të donte t’i provojë askush. “E kam përjetuar luftën dhe kam parë gjëra që asnjë njeri nuk do të donte t’i shohë. Kam përjetuar shumë gjëra në jetë”, është shprehur prizrenasi në intervistën e tij të gjatë për mediumin spanjoll.
Sulmuesi nga Prizreni ka zbuluar se ka kryer punë të ndryshme kur ishte më i ri dhe kur jetonte në Prizren, vetëm për të fituar.
“Para disa vjetësh kam punuar kamerier në Kosovë, kur isha 13 e 14 vjeç. Kam parë shumë gjëra. Punoja në një ‘grill house’. Punoja në një skarë dhe kujdesesha për sallatat. Kam filluar të punoj që në moshën nëntëvjeçare. Kam bërë punë të ndryshme”, ka deklaruar Muriqi, i cili po e gëzon një formë të jashtëzakonshme, ndërsa i ka realizuar 8 gola në 12 ndeshje të zhvilluara këtë sezon me Mallorcan. 28-vjeçari realizoi edhe mbrëmë në fitoren ndaj Atletico Madridit.