Qeveria e Kosovës ka marr vendim të mërkurën për ndarjen e 2.5 milionë eurove shtesë për blerjen e barnave esenciale në kuadër të Shërbimit Spitalor, Klinik dhe Universitar të Kosovës (ShSKUK), pak ditë pasi është raportuar për mungesë masive të ilaçeve të shtrenjta kundër kancerit.

Ministri i Financave, Punës dhe Transfereve, Hekuran Murati, gjatë mbledhjes së qeverisë ka është se është shqetësuese mungesa e vazhdueshme e barnave në vend.

“Ka të bëjë me ndarje shtesë të mjeteve buxhetore për blerjen e barnave esencial e në kuadër të ShSKUK-së. Kërkesa e tyre është për 2.5 milionë euro shtesë. Ne në vazhdimësi kemi ndarë mjete shtesë për blerjen e barnave esenciale, në rishikim kemi ndarë 8 milionë euro, në mbledhjen e kaluar kemi ndarë edhe 3.7 milionë euro shtesë, ishin edhe 1.5 milion euro të tjera për furnizim me oksigjen që në total ishte rreth 5.2 milionë euro. Është shqetësuese që në ShSKUK-ja vazhdon të ketë mungesë të barnave esenciale, dhe shpresoj që të mbyllet kjo sagë dhe të mos ketë më mungesë”, ka thënë Murati.