29 nëntor18:25
Gjykata e Beogradit ia vazhdon për 30 ditë paraburgimin Avni Qenajt Avokati mbrojtës i Avni Qenajt, Xhevdet Smakiqi, ka bërë të ditur se Gjykata e Beogradit ia ka vazhduar për 30 ditë paraburgimin shtetasit të Kosovës, Avni Qenaj. “Privimi i kundërligjshëm nga liria i ish-pjesëtarit të UÇK-së, Avni Qenaj!”, ka shkruar Smakiqi në llogarinë e tij. “S’pasi një Qeveri serioze të Kosovës, vazhdojnë kidnapimet e ish-pjesëtarëve të UÇK-së, sepse Qeveria po sillet në mënyrën më jo serioze për 5 vite në negociatat e Brukselit. Serbia lehtësisht po i shkel marrëveshjet e Brukselit, të cilat garantojnë lirinë e lëvizjes dhe të kapitalit si të drejta themelore njerëzore dhe parime themelore të BE-së. Kjo e drejtë nuk po zbatohet për ish-pjesëtarët e UÇK-së. Ish-pjesëtarit të UÇK-së, shtetasit të Republikës së Kosovës, Avni Qenaj, pa asnjë provë të vetme, Gjykata e Beogradit dje ia ka vazhduar edhe 30 ditë paraburgimin, në vend që ai të lirohej si rezultat i presionit diplomatik efektiv nga një Qeveri normale dhe serioze, e cila fatkeqësisht po mungon. Familja Qenaj, në këto ditë festive kombëtare, ndodhet nën ankth dhe e lënë e vetmuar, pa mbështetjen e shtetit për të cilin ka luftuar. Ajo po detyrohet të përballet vetë, me angazhime private dhe me avokatë, për të siguruar të drejtat ligjore dhe lirinë e lëvizjes për familjarin e tyre, sikur Qeveria e Kosovës të mos ekzistonte fare. Pafajësia e Avni Qenajt do të triumfojë, por çfarë kuptimi ka ekzistenca e shtetit dhe e Qeverisë së Kosovës kur dështon në çdo fushë? Liri për Avni Qenaj dhe gëzuar 28 Nëntorin – në qelinë e Beogradit ku po mbahet i kidnapuar, në kundërshtim me konventat ndërkombëtare.”, ka shkruar Smakiqi në reagimin e tij. Avni Qenaj nga fshati Romajë i Prizrenit është arrestuar nga autoritetet serbe para tre ditësh
