Ish-deputeti i Kuvendit të Kosovës, Sekretari i Përgjithshëm i AAK-së, Muharrem Nitaj, i ka reaguar ministrit të Financave, Hekuran Muratit rreth qëndrueshmërisë ekonomike në vend.

Nitaj përmes një postimi në “Facebook” i ka bërë me dije ministrit Murati se gjendja ekonomike tani në Kosovë është më e rënda në këto 20 vitet e fundit.

Postimi i plotë i tij:

Cila është qëndrueshmëria e jashtëzakonshme e ekonomisë së Kosovës, që e propagon Ministri i Financave!?

A është qëndrueshmëri ekonomike inflacioni prej 19.2 %, apo rënja drastike e fuqisë blerëse të qytetarit të Kosovës.

Për çfarë qëndrueshmërie ekonomike flet Ministri, kur Kosova po hyn në javën e katërt të grevës së rreth 20 e sa mijë punëtorëve të arsimit dhe pothuaj dhjetëfishin e nxënësve në shtëpi, apo kur armata e punëtorëve të sektorit privat, është në gjendje tejet të rëndë për shkak të pagave që nuk e përballojnë dot koston e shtrenjtuar të jetesës.

A është qëndrueshmëri ekonomike alarmi se Kosova mund të përballet me një dimër të vështirë, e qarja nuk po i gjindet sigurisë energjetike.

Apo qëndrueshmëria ka të bëjë me ndërprerjen e investimeve kapitale e me ndërprejen e dhjetëra projekteve për shkak të mosharmonizimit të kontratave me shtrenjëtimet marramendëse të viteve të fundit.

Ndoshta Ministri, qëndrueshmëri ekonomike e konsideron vetëm kuletën e shtetit, që është fryer, por që janë para të ndenjura. Dhe gjërat e ndenjura, mbajnë erë.

Nuk e di si mund t’i duket Ministrit qëndrueshmëria ekonomike në zyrë, por gjendja në tërren është tjetër. Ndoshta më e rënda në këto 20 vjetët e fundit!