Partia Laburiste e Australisë do të rrëzojë konservatorët nga pushteti, ndonëse do të mund të formojë qeveri të pakicës, ka thënë transmetuesi australian, ABC.

Rezultatet fillestare tregojnë po ashtu se koalicioni i kryeministrit konservator, Scott Morrison dhe opozita laburiste, kanë humbur mbështetje ndërsa te partitë më të vogla, sikurse partitë e gjelbra dhe të pavarurit e fokusuar në klimë, ka ndodhur e kundërta.

Anthony Albanese pritet të jetë kryeministri i ri i shtetit, teksa Australia do të ketë Qeverinë e parë laburiste pas gati një dekade.

Përveç mbiemrit, a ka Albanese prejardhje shqiptare?

Anthony Albanese është i biri i Carlo Abanese-s nga Barletta e Italisë dhe Maryanne Ellery, australiane me prejardhje irlandeze.

Qyteza Barleta shtrihet në jug të Italisë, në rajonin Apulia. Sipas faqes greke, “Greek City Times”, në Apulia jeton një komunitet i madh i arbëreshëve. Besohet se atje jetojnë rreth 100.000 arbëreshë dhe se nga ky komunitet e ka prejardhjen edhe babai i politikanit australian, që ka gjasa të mira për t’u bërë kryeministër.

Një shenjë e fuqishme për prejardhje arbëreshe është mbiemri “Albanese”, që nga italishtja në gjuhën shqipe do të thotë “shqiptar”.

Kryeministri Morrison e ka pranuar humbjen.

“Besoj se është shumë e rëndësishme që ky shtet ka siguri. Mendoj se është shumë e rëndësishme që shteti të mund të ecë përpara”, ka thënë ai.

Asnjëra prej partive nuk pritet të fitojë minimumin prej 76 ulëseve në Parlamentin me 151 deputetë, mirëpo laburistët janë në rrugë për të fituar më shumë se 70 ulëse, ka thënë transmetuesi australian.

Edhe televizioni tjetër, Sky News, ka thënë se laburistët janë në rrugë drejt fitores.